Кафе "Бульбяная" - Белорусы форума, соединяйтесь :-)

[per]

22 красавіка 1794 году – дата пачатку паўстаньня Касьцюшкі ў Беларусі

Ул. інф.

Што адбывалася ў Беларусі і ў сьвеце 22 і 23 красавіка


Сёньня ў сьвеце адзначаецца Міжнародны дзень Зямлі. Ён усталяваны ААН у 1971 годзе і прыпадае на веснавое раўнадзенства. А гісторыя гэтага Дня зьвязаная з драматычнымі падзеямі, калі ў амэрыканскім горадзе Санта-Барбара разьлілося цэлае мора нафты, і ўсё прыроднае навакольле гінула пад нафтавай плёнкай. Тады й было вырашана адзін дзень на год прысьвячаць абароне плянэты ад экалягічнага заражэньня.

22 красавіка 1725 году адбыўся шлюб вельмі калярытных постацяў беларускай гісторыі – Урсулы Францішкі Вішнявецкай і нясьвіскага ардыната, вялікага гетмана Міхала Казімера Радзівіла, празванага Рыбанькам. Хранікёры пішуць, што гэта быў шчасьлівы саюз. Урсула так кахала мужа, што падаравала яму мноства паэтычных твораў і ажно трыццаць шэсьць дзяцей. Праўда, па волі лёсу большасьць іх памерла ў маленстве, а з сыноў выжыў толькі адзін – улюбёнец шляхты, славуты Пане Каханку. Тое вясельле, пра якое мы згадваем сёньня, цягнулася цэлы год. Маладыя сьвяткавалі ў фамільных маёнтках, у сваякоў, ладзілі карнавалы ў сталіцах і толькі праз год іх сустракалі дома, у Нясьвіжы.

22 красавіка 1794 году – дата пачатку вызвольнага паўстаньня пад кіраўніцтвам Тадэвуша Касьцюшкі на беларускіх землях. У гэты дзень кіраўніцтва паўстаньнем у Вялікім Княстве ачоліў палкоўнік Якуб Ясінскі.

22 красавіка 1838 году слынны ўкраінскі кабзар Тарас Шаўчэнка піша сваю знакамітую паэму “Кацярына”, якую потым перакладзе на беларускую мову Янка Купала:

Кахайцеся, чарнабрыўкі,
Ды не з маскалямі,
Маскалі – чужыя людзі,
Чыняць ліха з вамі, –

так пачынаецца гэтая паэма.

22 красавіка 1937 году ў абставінах сталінскага тэрору скончыў жыцьцё самагубствам Язэп Адамовіч, адзін зь першых кіраўнікоў беларускага савецкага ўраду.

Сярод вядомых людзей, што прыйшлі на сьвет 22 красавіка ў розныя гады, згадаем сёньня правадыра расейскай пралетарскай рэвалюцыі Ўладзімера Ільліча Леніна і амэрыканскага кінаактора Джэка Нікалсана.

Цяпер – пра каляндар заўтрашняе суботы.

Заўтра ў сьвеце адзначаецца Міжнародны дзень кнігі і абароны аўтарскіх правоў.

23 красавіка 1924 году ў мястэчку Друя распачынаюць сваю працу айцы-марыяне, беларускія каталіцкія сьвятары, якія ўнесьлі вялікі ўклад у нацыянальнае і культурнае адраджэньне Беларусі. Пад іхным уплывам Друя ператварылася ў цэнтар духоўнага жыцьця краю. Двое з друйскіх асьветнікаў абвешчаныя сьвятымі.

23 красавіка ў розныя гады прыйшлі на сьвет клясык беларускай літаратуры Зьмітрок Бядуля, беларускі філёзаф-эстэтык Уладзімер Конан і празаік Віктар Казько. Такім чынам, атрымліваецца, што 23 красавіка – літаратурная або пісьменьніцкая дата. Прычым ня толькі ў Беларусі, але і ў цэлым сьвеце. Вянчае доўгі пералік народжаных у гэты дзень літаратараў імя Ўільяма Шэксьпіра, ангельскага драматурга, які прыйшоў на сьвет у 1564 годзе.